मुंबई दहशतवादी हल्ल्याचा मास्टरमाइंड असलेल्या साजिद मीरवर अमेरिकेने ५० लाख डॉलरचे बक्षीस जाहीर केले आहे. साजिद हा लष्कर-ए-तोयबाचा सदस्य असून तो पाकिस्तानमध्ये असल्याची शक्यता वर्तवण्यात येत आहे.
मुंबईवर २६ नोव्हेंबर २००८ रोजी झालेल्या दहशतवादी हल्ल्याचा मास्टरमाइंड असलेला साजिद मीरवर अमेरिकेने मोठे बक्षीस जाहीर केले आहे. साजिदवर अमेरिकेने तब्बल ५० लाख डॉलरचे बक्षीस जाहीर केले आहे. मुंबईवरील दहशतवादी हल्ल्याला नुकतीच १२ वर्ष पूर्ण झाली. या हल्ल्यात १६० हून अधिकजण ठार झाले होते. मृतांमध्ये भारतीयांसह इतर देशांच्या नागरिकांचा समावेश आहे.
साजिद मीर हा पाकिस्तानमधील लाहोरचा राहणारा आहे. एफबीआयच्या मोस्ट वॉन्टेड लिस्टमध्येही साजिदचा समावेश आहे. मुंबई हल्ल्याचा तपास सुरू असताना साजिद मीरचे नाव समोर आले. साजिद मीर हा लष्कर-ए-तोयबा या दहशतवादी संघटनेचा वरिष्ठ सदस्य आहे.एफबीआयच्या वेबसाइटवर साजिद मीरचा वेगवेगळ्या पद्धतीने फोटो आहे. तपाय यंत्रणांनी दिलेल्या माहितीनुसार, साजिद मीर हा सहजपणे आपला चेहरा बदलू शकतो. त्याशिवाय तो आपल्या खऱ्या नावांऐवजी अनेक खोट्या नावाने वावरतो. यामध्ये इब्राहिम, वासी, खालिद, वसीभाई, अली भाई, मूसा भाई, साजिद माजीद, भाई मूसा, इब्राहिम शाह, आदी नावांचा समावेश आहे. त्याला हिंदी, उर्दू, इंग्रजी आणि अरबी भाषेचे ज्ञान आहे.. साजिद मीर सध्या पाकिस्तानमध्येच लपून बसला असल्याची माहिती तपास यंत्रणांना दिली. दरम्यान, दुसरीकडे मु्ंबई झालेल्या दहशतवादी हल्ल्याशी संबंधित असलेला पाकिस्तानी वंशाचा कॅनडातील व्यावसायिक तहव्वूर राणा याच्या प्रत्यार्पणाची प्रक्रिया वेगाने सुरू आहे. राष्ट्रीय तपास यंत्रणा (एनआयए) प्रत्यार्पण कारवाई सुरू केली आहे. एनआयएची चार सदस्यीय पथकाने नोव्हेंबरच्या पहिल्या आठवड्यात अमेरिकेत प्रशासनाची भेट घेऊन प्रत्यार्पणाबाबत चर्चा केली.
